人到中年，虧到可憐。
今日真真正正feel到自己人到中年嘅嗰種無力感，
唔撚係咩心入面嗰啲無力感，
而係真係工作起上嚟力不從心嗰隻無力感。
之前我仲細幾歲嘅時候，
有好多大我十年八載嘅友人，
都分別同我講過話：「你呀，一到40，體能就會開始差㗎喇！」
我：「係咪通唔到頂嗰隻呀？30歲開始已經係啦..」
友：「唔止㗎，一到40個人會易攰好多，好明顯㗎！」
我：「有冇咁誇張呀...」
頂你個街，
原來真係有咁誇張。
唔好睇我表面咁虧，
其實我一向都係精力充沛底，
以前我成日覺得啲人郁啲就話要休息真係好削好流。
吖頂，
呢幾日排戲，
或者係我好死唔死寫咗個好高energy嘅角色俾自己啦，
又或者係我低能仔用錯力啦，
又或者係我始終都係虧啦，
每一場完咗，我都好似擔完泥咁攰，
我竟然需要嗰啲我以前唔稀罕嘅休息時間..
今日排完戲返緊屋企嗰陣，
我真係好攰好攰好攰好攰好攰...
甚至我有一刻諗過，不如都係收皮唔搞了。
咁當然只係諗下，開始咗就點都會完成佢..
如果而家連呢啲少少嘢都唔做出嚟，
我只會覺得自己越嚟越廢，所以我一定會繼續。
講到嚟呢度，
你梗係以為呢個係一個平淡嘅保健產品廣告嚟。
可惜唔係，
呢個只係一個活生生嘅真人虧事，
獻給所有人到虧年嘅朋友，
你並不孤單。
或者係想睇吓有冇虧仔虧女都係咁，
等我睇吓自己孤唔孤單。
Search